தேடல்

ஒரு புதிய தொடக்கம்

2009-08-20T22:57:00.002+08:00

மீண்டும் ஒரு புதிய தொடக்கம். நண்பர் சதங்கா தொடங்கி வைத்த பயணம் இது.

நீண்ட நாட்களாக மனதிற்குள் இருந்த எண்ணத்தை நண்பர் குடுத்த பரிசு ஊக்கப்படுத்தி வெளிக் கொண்டு வந்து இருக்கிறது. என்ன எழுதப் போகிறேன் என்பது இன்னும் முடிவாகவில்லை. ஆனால் சமீபத்தில் படித்தப் புத்தகங்கள் என்னுள் ஒரு புதிய எண்ண அலையை உருவாக்கி இருக்கிறது. ஒரு விதமான மாற்றத்தை கொண்டு வந்து இருக்கிறது.

நிறைய எழுத வேண்டும். எழுதுவேன்.

தெருவாசகம் -உதவி இயக்குநர்

2006-08-05T08:26:00.000+08:00

தெருவாசகம் - போஸ்டர் ஒட்டுபவன்

2006-01-04T07:27:00.000+08:00

ஊரடங்கும் நள்ளிரவில்
ஒட்டுகிறான் சுவரொட்டி
தான் மட்டும் உறங்காத
தகவலையும் தெரிவிக்க

..........
..........

திக்கேதும் தெரியாமல்
திணறுகின்ற தன் வாழ்வை
முக்குச் சந்துகளில்
மூச்சுமுட்ட ஒட்டுகிறான்

ஊரோடு 'ஒட்டி வாழ்தல்'
உயர்வெனும் தத்துவத்தை
ராவோடு ராவாக
நடைமுறைப் படுத்துகிறான்

.......
.......

இன்றோடு கடைசியென
துன்பத்தை நினைத்தவாறு
அன்றாடம் ஒட்டுகிறான்
அகலாதக் கனவோடு

ஒட்டாமல் இருப்பவர்கள்
உலவுகின்ற வீதிகளில்
ஒட்டுவதால் இருக்கின்றான்
உண்மைகளை கிழிக்கின்றான்

இண்டு இடுக்கெல்லாம்
இருக்குமிவன் கைரேகை
கண்டு செல்பவர்கள்
காண்பதில்லை கண்ணீரை.

படித்து முடித்த போது, கனதுப் போனது மனசு. கல்லூரி நாட்களில், சிதம்பரத்தில் இருந்து சென்னைக்கு வரும் பொழுது அதிகாலையில் தான் வந்து சேருவேன். அப்பொழுது இந்த போஸ்டர் ஒட்டுபவர்களைப் பார்த்திருக்கிறேன். அவர்கள் ஒட்டிய போஸ்டர் மனசோடு ஒட்டிக் கொண்டது, அவர்களை மறந்துப் போனது. ஆனால் இந்த கவிதை அவர்களை மனசில் பதித்து விட்டது. பதிப்பாளர் பிரச்சனை வரும் என்பதால் முழு கவிதையையும் நான் இங்கு தரவில்லை.

நாளை நிஜம் எனில் மீண்டும் சந்திப்போம்.

தெருவாசகம்

2006-01-03T07:18:00.000+08:00

நான் சமீபத்தில் படித்த புத்தகம் இது. எழுதியவர் யுகபாரதி. ஆனந்த விகடனில் ஒரு பக்க கவிதையாய் வந்தவைகளை புத்தகமாக போட்டிருக்கிறார்கள். என் மனதை மிகவும் பாதித்த புத்தகம். யுகபாரதி, உண்மையில் புதுயுக பாரதி தான். கவிதைகளில் ஈரம் அதிகம்.

புத்தகத்தின் முன்னுரையில் சீனிவாசன் என்பவர் மிக அழகாக எழுதியிருக்கிறார்.

"ஆதியும் அந்தமுமான அந்த இறைவனைப் பாடியது திருவாசகம். வீதியே சொந்தமென்று கிடக்கின்ற சாமான்யர்களுக்கானது இந்த தெருவாசகம்"

இந்த புத்தகம் கிடைத்தால் அவசியம் படிக்கவும். என் அடுத்த பதிவில் சில கவிதைகளில் இருந்து சில வரிகளை மட்டும் எடுத்து எழுதப் போகிறேன்.

நாளை நிஜம் எனில் மீண்டும் சந்திப்போம்.

ஞானமுள்ள வாழ்க்கை

2006-01-02T11:29:00.000+08:00

அனைவருக்கும் இனிய புத்தாண்டு வாழ்த்துக்கள்.

நீண்ட நாட்கள் ஆகி விட்டது வலைப்பதிவில் வலம் வந்து. நேரம் கிடைக்காமல் இல்லை, நேரத்தை சரிவர நிர்வகிக்கத் தெரியாததே காரணம். இடைப்பட்ட நேரத்தில் நிறைய வலைப் பூக்கள் படிக்க நேர்ந்தது. அப்படி படித்தவைகள் என்னை ஆச்சரியத்தில் ஆழ்த்தியது. இவர்கள் இப்படி தெளிவாய் எழுத எது உதவியது என்ற கேள்வி எழுந்தது. இவர்கள் கேள்விக் கேட்டு தங்களை அறிந்தவர்கள் என்பது புரிந்தது. கேள்வி கேட்கும் பொழுது இவர்கள் நிறைய குழம்பியிருக்க வேண்டும் எனற எண்ணம் தோன்றியது. அந்த எண்ணம் பாலகுமாரனின் "குருவழி" என்ற புத்தகத்தைப் படித்த போது உறுதியானது. அதில் பாலகுமாரன் எழுதியிருப்பது,

"குழம்பியது தானே தெளியும். கலங்கிய நெஞ்சம்தான் விவேகமாகும். அப்படிக் கலங்குவதுதான் யோகம். கலங்கிய பிறகு தான் ஞானம். ஞானமுள்ள வாழ்க்கை தான் நிறைவுள்ள வாழ்க்கை."

அது தான் அவர்களின் பலம் எனறு புரிந்தது. அவர்களைப் போல் அனைவரும் ஞானமுள்ள வாழ்க்கை வாழ வேண்டும் என்கின்ற ஆசைத் தோன்றியது. அந்த ஆசை நிஜமாக எல்லாம் வல்ல இறைவனை வேண்டுகிறேன்.

நாளை நிஜம் எனில் மீண்டும் சந்திப்போம்.

படித்ததில் ரசித்தது....

2005-08-30T06:08:00.000+08:00

எண்ணிப் புள்ளி வைத்த
இழைக் கோலம் மறந்து போகும்.
உண்ணச் சோறு எடுத்தால்
உன் நினைப்பால் புரைக்கேறும்
தண்ணீருக்கு உருளும் ராட்டை
உன்னைப் போல் முரடாய் பேசும்
துணி உலர்த்தும் கொடிக் கயிற்றில்
அணி வகுக்கும் அண்டங் காக்கை
உன் பெயரைச் சொல்லிக் கரையும்
பாடத்தில் வரிகள் மாறி
பாதியில் உன் முகம் தெரியும்
உனக்கென்ன புத்தகம் கவிதையொன்று
எப்படியோ பொழுது போகும்.........
எனக்கு? உன் நினைவே கவிதையாகும்.
--மாலன்

("மாலன் சிறுகதைகள்" என்ற தொகுப்பில் இருந்து எடுத்தது)

வாரக்கடைசிப் புகைப்படம்

2005-08-20T10:23:00.000+08:00

செப்புமொழிகள் - 10

2005-08-20T09:50:00.000+08:00

வாழ வேண்டும் என்று நினைக்கிறவனுக்கு என்ன வேண்டும்? எந்த விமர்சனத்தையும் தூக்கி எறிய வேண்டும்.
-கவிஞர் கண்ணதாசன்

நான் இதனை பல நேரங்களில் கடைப்பிடித்திருக்கிறேன். சில நேரங்களில் மட்டும் உணர்ச்சிகள் மேலோங்கிய போது அந்த விமர்சனங்களை மனசுக்குள் எடுத்துக் கொண்டு கஷ்டப்பட்டிருக்கிறேன். இதனைப் படித்த பின் தான் இனி எல்லா விமர்சனங்களையும் தூக்கி எறிய வேண்டும் என்கின்ற எண்ணத்தை வளர்த்துக் கொண்டிருக்கிறேன்.

ஒரு வகையில் இதுவும் தேடல் தான்!

2005-08-11T06:55:00.000+08:00

மாற்றம் வேண்டும்

2005-08-08T13:10:00.000+08:00

பிள்ளைகளின் குணத்திலும்,
மனைவியின் ஒத்துழைப்பிலும்,
பெற்றோர்களின் புரிதலிலும்,
நண்பர்களின் நட்பிலும்,
உறவுகளின் அனுசரணையிலும்,
ஊரின் போக்கிலும்,
அரசாங்கத்தின் ஆட்சியிலும்,
மாற்றம் வேண்டும்.
இவை மாறிய போதும்
நான் மட்டும் மாறாது
இருத்தல் வேண்டும்.

நன்றி, நன்றி, நன்றி

2005-08-07T14:33:00.000+08:00

அருமையான ஒர் கவிதைப் போட்டியை நடத்தி எல்லோராலும் கவிதை எழுத முடியும் என்ற நம்பிக்கையை அளித்து, அற்புதமான கவிதைகளைத் தேர்ந்தெடுத்து அவைகளுக்கு பரிசும் அளித்த நாராயணன் அவர்களுக்கு என்னுடைய நன்றி, நன்றி, நன்றி.

வாரக்கடைசிப் புகைப்படம்

2005-08-06T18:21:00.000+08:00

வித்தை காட்டுபவர்களிடம் தப்பி வேடிக்கைப் பார்பவர்களிடம் மாட்டிக் கொண்டேன். இனி எப்பொழுது சுதந்திரமாய் ......

ஆத்ம திருப்தி

2005-08-04T07:06:00.000+08:00

ஒரு முறை தொலைக்காட்சிப் பேட்டி ஒன்றில் நடிகர் ராஜ்கிரண், இளையராஜாவைப் பற்றி கூறிப்பிடும் போது, "இளையராஜா இசையில் மட்டும் ஞானி அல்ல ஆன்மீகத்திலும் அவர் ஒரு ஞானி. அவரை பார்ப்பதற்காக அவரின் இசை கூடத்திற்கு போயிருந்தேன். அப்பொழுது தான் அவரும் வீட்டிலிருந்து இசை கூடத்திற்கு வந்தார். அவர் மீது எனக்கு அளவு கடந்த பக்தி என்பதால் அவர் காலைத் தொட்டு கண்களில் ஒற்றிக் கொண்டேன்.

உடனே இளையராஜா "எதற்கு இது" என்றார்.

நான் " ஒரு ஆத்ம திருப்திக்காக" என்றேன்.

அதற்கு அவர் " ஆத்ம திருப்தி அடைந்து விட்டால் பரமாத்மா ஆகிவிடும்" என்றார்.

நான் அசந்துப்போய் நின்னேன்."

ஒரு ஆத்மா திருப்தி அடைந்துவிட்டால், அது ஒன்று பரமாத்மாவாகிவிடும் அல்லது மகாத்மாவாகிவிடும். எவ்வளவு பெரிய உண்மை இது.

எப்போழுது என் ஆத்மா திருப்தி அடையும்?

வாரக்கடைசிப் புகைப்படம்

2005-07-30T07:00:00.000+08:00

"தனிமை கண்டது உண்டு அதுலே சாரம் இருக்குதம்மா"

விடுதலை!

2005-07-29T22:51:00.000+08:00

கண்ணாடிக்கு அப்பால்
மழை நனைத்த
மரம் பார்த்தபடி;
மனிதமனம் சிலிர்த்ததால்
கண்ணாடி சீசாவிற்குள்
அடைப்பட்ட பூக்கள்
ஏக்கத்தோடு வேண்டியது
மழையில் நனைய
விடுதலை!

நம்பிக்கை

2005-07-28T07:00:00.001+08:00

குழிவிழுந்த கன்னமும்
தோல்சுற்றிய தேகமும்
ஒட்டிய வயிறுமாய்
வறண்டபூமியில் ஒர்தளிர்
செஞ்சிலுவையின் நேசக்
கரத்திற்காக காத்திருக்கையில்
கண்கள்மட்டும் ஒளிரும்
உயிர்வாழும் நம்பிக்கையில்!

செப்புமொழிகள் - 9

2005-07-28T05:48:00.000+08:00

ஒரு பெண்ணின் ஆத்ம பலத்தின் முன்னால் மதுரை மன்னனும், நகரமும் நிற்க முடியாமல் அழிந்த கதை சிலப்பதிகாரம். பெண்மை மென்மை தான்; ஆனால் அதன் ஆத்மா இரும்பினும் வலியது. கால மாற்றத்தில் அழுத்தம் ஏற்படும்போது வீசும் புயல், தென்றலிலிருந்து பிறந்ததுதான்.
-கவிஞர் கண்ணதாசன்

தோற்றுப்போனோம்!

2005-07-26T06:59:00.000+08:00

எங்கள் மனிதனை
மந்திரியாக்கி
மாற்றம்வர காத்திருந்தோம்
மந்திரி மனம் மாறியதால்
மீண்டும் மனிதனாக்க முயன்றோம்
தோற்றுப்போனோம்!

இருந்து பாடிய இரங்கற்பா

2005-07-25T00:10:00.000+08:00

ரம்யா அவர்கள் நிகழ்வுகளின் தாக்கங்கள்..... என்ற தன் வலைப்பதிவில் நான் இறந்தால் என்ன பேசிக் கொள்வார்கள்? என்ற தலைப்பில் ஒரு பதிவினை வெளியிட்டு இருக்கிறார். அதில் "நீங்க இறந்த பிறகு இரங்கல் கூட்டத்துக்கு வரவங்க உங்களைப் பத்தி என்ன பேசுவாங்க, என்ன பேசணும்ன்னு நீங்க நினைக்கிறீங்கன்னு எழுதணும்" அப்படினு எழுதியிருக்கிறார். அதை படித்தவுடன் எனக்கு என் அப்பா அவர் உயிரோடு இருக்கும் பொழுது எழுதிய "இருந்து பாடிய இரங்கற்பா" தான் நியாபகத்திற்கு வந்தது. அதனை இங்கு தந்திருக்கிறேன்.

பாரியொடும் கொடைபோகப் பார்த்தனொடும்
கணைபோகப் படர்ந்த வல்வில்
ஓரியொடும் அறம்போக உலகமறை
வள்ளுவனோ டுரையும் போக
வாரிநறுங் குழல்சூடும் மனைவியொடும்
சுவைபோக, மன்னன் செந்தீ
மாரியொடுந் தமிழ்போன வல்வினையை
என்சொல்லி வருந்து வேனே!

தேனார்செந் தமிழமுதைத் திகட்டாமல்
செய்தவன்மெய் தீயில் வேக,
போனாற்போ கட்டுமெனப் பொழிந்ததிரு
வாய்தீயிற் புகைந்து போக,
மானார்தம் முத்தமொடும் மதுக்கோப்பை
மாந்தியவன் மறைந்து போக,
தானேஎந் தமிழினிமேல் தடம்பார்த்துப்
போகுமிடம் தனிமை தானே!

பாட்டெழுதிப் பொருள்செய்தான் பரிதாபத்
தாலதனைப் பாழுஞ் செய்தான்;
கேட்டழுத பிள்ளைக்கோர் சிறுகோடும்
கீறாமற் கிளைமு றித்தான்;
நாட்டழுகை கேளாமல் நந்துயரும்
காணாமல் நமனெனும்பேய்
சீட்டெழுதி அவன் ஆவி திருடியதை
எம்மொழி யாற்செப்பு வேனே!

பொய்யரையும் இசைபாடிப் புல்லரையும்
சீர்பாடிப் புகழ்ந்த வாயால்,
மெய்யரையும் வசைபாடி வேசையையும்
இசைபாடி விரித்த பாவி,
கையரையும் காசின்றிக் கடைநாளில்
கட்டையிலே கவிழ்ந்த தெல்லாம்
பொய்யுரையாய்ப் போகாதோ புத்தாவி
கொண்டவன் தான் புறப்ப டானோ!

வாக்குரிமை கொண்டானை வழக்குரிமை
கொண்டானை வாத மன்றில்
தாக்குரிமை கொண்டானைத் தமிழுரிமை
கொண்டானைத் தமிழ் விளைத்த
நாக்குரிமை கொண்டானை நமதுரிமை
என்றந்த நமனும் வாங்கிப்
போக்குரிமை கொண்டானே! போயுரிமை
நாம்கேட்டால் பொருள்செய் யானோ!

கட்டியதோர் திருவாயிற் காற்பணமும்
பச்சரிசி களைந்தும் போட்டு
வெட்டியதோர் கட்டையினில் களிமண்ணால்
வீடொன்றும் விரைந்து கட்டி
முட்டியுடைத் தொருபிள்ளை முன்செல்லத்
தீக்காம்பு முனைந்து நிற்கக்
கொட்டியசெந் தமிழ்ந்தக் கொழுந்தினிலும்
பூப்பூத்த கோல மென்னே!

போற்றியதன் தலைவனிடம் போகின்றேன்
என்றவன்வாய் புகன்ற தில்லை;
சாற்றியதன் தமிழிடமும் சாகின்றேன்
என்றவன்வாய் சாற்ற வில்லை;
கூற்றவன் தன் அழைப்பிதழைக் கொடுத்தவுடன்
படுத்தவனைக் குவித்துப் போட்டு
எற்றியசெந் தீயேநீ எரிவதிலும்
அவன்பாட்டை எழுந்து பாடு!

வாரக்கடைசிப் புகைப்படம்

2005-07-23T05:21:00.000+08:00

நான் ரசித்த தாமரை முழுவதும் விரிந்து வரவேற்றபடி

நம்பிக்கை

2005-07-22T08:52:00.000+08:00

நாராயணன் சார் அவரின் வலைப்பதிவில் "நம்பிக்கை" என்றத் தலைப்பில் ஒரு கவிதைப் போட்டி நடத்துகின்றார். அதற்காக எழுதப்பட்டது இது. என்னுடைய அனுபவத்தை இதில் எழுதியிருக்கிறேன். நிறையப் பேருடைய அனுபவமும் இதுவாக தான் இருந்திருக்கும் என்று நம்புகிறேன்.

வார்த்தைகளைக் கோர்த்து
எண்ணங்களைக் கிறுக்கி
கவிதையெனப் பேரிட்டு
வலைப்பதிவில் இட்டு
கருத்துகளுக்கு காத்திருக்கையில்
"அருமை!" என கருத்துவர
நம்பிக்கைப் பிறக்கும்
"இனி நானும் கவிஞன்!"

செப்புமொழிகள் - 8

2005-07-22T06:12:00.000+08:00

மூடிவைத்த புத்தகம் எப்போதும் திறக்கப்படலாம்; முடிந்துவிட்டதாகக் கருதும் நினைவுகள் எப்போதும் ஆரம்பமாகலாம். ஒவ்வொரு வருஷத்திலும் மழைக்காலம் இருப்பதை மறவாதே!
-கவிஞர் கண்ணதாசன்

நம்பிக்கையை ஊட்ட சொல்லப்பட்டதாய் இருக்கும் என்று நினைக்கிறேன். காரணம் நம்பிக்கையை தான் நாம் அடிக்கடி இழந்து விடுகின்றோம். அதனால் தானோ என்னவோ நம்ம நாராயணன் சார் அந்த தலைப்பிலேயே ஒரு போட்டி வைத்திருக்கிறார்.

பூ சொன்னப் பாடம்

2005-07-21T08:52:00.000+08:00

பூ சிரித்ததைப் பார்த்து
நான் சிரித்தேன்
நான் சிரித்ததைப் பார்த்து
பூ சொன்னது;
'சிரிப்பு சிரிப்பை தந்து
நட்பு வளர்க்கும்'

படம் உதவி nep

ஆறடி நிலமே சொந்தமானது!

2005-07-20T15:15:00.000+08:00

துளி விந்தில் உயிர் தந்து
சாண் வயிற்றுக்குள் உடல் வளர்த்து
ஆறாம் அறிவை அவசியத்திற்கு வைத்து
ஆறடி நிலத்தை அளந்துத் தந்து
மனிதனை இறைவன் படைத்திட்டான்!

இருவரின் இச்சையில் பிறப்பு எடுத்து
ஒருவனின் பிச்சையில் உயிர் வாழ்ந்து
எல்லாம் தனதாய் ஆர்ப்பரித்து;
ஆசையும், தேவையும், அளவும் அறியாது
ஆணவத்தின் உச்சி நின்று ஆக்ரமித்தான்!

ஆடாத ஆட்டம் எல்லாம் ஆடி
உயிர் துறந்து கூடு ஒடுங்கியப் போது,
மனிதன் இறைவனை நினைத்திட்டான்
அளந்து வைத்த ஆறடி நிலத்திற்காக
நன்றிச் சொன்னான்!

பொறுத்தவர் யாவரும்

2005-07-19T06:16:00.000+08:00

கண் மூடி தலை சாய
நடு நெற்றியில் ஒர் ஒளிப்பிம்பம்
நல் வழி இட்டுச் செல்லும்
மனம் ஒழுங்குப்பட வழி வகுக்கும்!

அமைதித் தேடி அமர்ந்து இருக்க
மூச்சை மட்டும் கவனித்து இருக்க
மனம் ஒர் இடம் நிலையாது
குரங்காய் எண்ணம்விட்டு எண்ணம் தாவும்!

இழுத்து வந்து ஒரிடம் சேர்க்க
அடங்காது அறுத்துக் கொண்டோடும்
அதன் வழி விட்டு காத்திருக்க
கால் சுற்றி மடிஅமரும் நாயாகும்!

பழக்கத்தில் யானை இங்கு பந்தடிக்கும்
பழக்கியவன் கவனமும் காரணமாகும்
புத்தியின் கவனத்தில் மனசை வைத்தால்
பழக்கத்தில் மனசும் ஒரிடம் அமரும்!

பொறுமை இங்கு ஆமை யாயின்
பெறுவது யாவும் நன்மை யாகும்
பொறுத்தவை யாவும் பூமி வாழும்
பொறுத்தவர் யாவரும் தன்னை ஆள்வர்!

(இதனை எழுதி முடித்தப் போது எல்லா உதாரணங்களும் மிருகங்களை வைத்து வந்திருக்கிறது என்பதை உணர்ந்தேன்.)

செப்புமொழிகள் - 7

2005-07-19T05:41:00.000+08:00

வாழ்க்கையை அனுபவி; நன்றாக அனுபவி; மயங்கி விளையாடு; இன்ன தேதியில் மரணமென்று தெரியாதவரை எந்தத் தேதியிலும் வந்துவிடலாம் அல்லவா?
-கவிஞர் கண்ணதாசன்

தீதும் நன்றும்

2005-07-18T06:31:00.000+08:00

என்னிடம் நிறைய பேர் குறைப்பட்டுக் கொண்டு இருக்கிறார்கள்.

"அவனால் தான் நான் இந்த நிலைமைக்கு வந்தேன்."

"அவர்கள் செய்த கொடுமையால் தான் எனக்கு இந்த நிலைமை."

"அவனை நம்பால் இருந்திருந்தால் எனக்கு எந்த விதமான பிரச்சனைகளும் வந்திருக்காது"

இவவாறு நிறைய. இவர்கள் குறைப்பட்டுக் கொள்ளும் பொழுதுயெல்லாம் எனக்கு சிரிப்பு தான் வரும். கூடவே கேள்விகளும் வரும். எப்படி இவர்களின் அனுமதியில்லாமல் அது நடந்திருக்க கூடும்?. தன் வாழ்க்கையினை யாரிடமோ ஒப்படைத்துவிட்டு எப்படி இவர்களால் இருக்க முடிகிறது? இவர்களை மீறி எப்படி ஒருவர் இவர்களுக்கு துன்பம் விளைவிக்க முடியும்.

இதன் அடிப்படைக் காரணத்தை அறிய ஆசைப்பட்டேன். அதை என்னிடமே தேடியப் போது, எனக்குத் தோன்றியது ஒன்று தான். இவர்கள் அடிப்படையில் சோம்பேறிகள். நல்லது கெட்டதை யோசிக்க மறுப்பவர்கள். தனக்கு எது நல்லது என்பது தன்னை விட மற்றவர்களுக்கு நன்றாகத் தெரியும் என்று நம்பும் முட்டாள்கள். தன்னை விட மற்றவர்களுக்கு எல்லாம் தெரியும் என்று நினைப்பவர்கள் அதனால் யார் என்ன சொன்னாலும் எதனையும் ஆராயாமல் அதன்படி உடனே செய்வார்கள். அவர்கள் செய்ததின் மூலம் நல்லது நடப்பின் தங்களால் நடந்தது என்றும், கெட்டது நடப்பின் பிறரால் நடந்தது என்றும் பேசுவார்கள். இவர்களுக்கு நான் ஒன்றை தான் சொல்லிக் கொள்ள ஆசைப்பட்டேன் அது,

"தீதும் நன்றும் பிறர் தர வாரா"

நான் என் வாழ்க்கையில் இதனை அனுபவத்தில் உணர்ந்தேன். சில ஆண்டுகளுக்கு முன் ஏதாவது சொந்தத் தொழியில் செய்யலாம் என்று நினைத்து நானும் என் சகோதிரியின் மகனும் சேர்ந்து ஒரு கணினித் தொழியில் தொடங்கினோம். நான் மட்டும் முழு நேர ஊழியனாக வியாபாரத்தைப் பார்த்துக் கொண்டேன். என் நண்பனின் மூலம் அவனின் நண்பரும் எங்களுடன் வந்து சேர்ந்துக் கொண்டார்.

நான் ஒரு விஷயத்தையும் ஆராயாமல் சரி வர விதிமுறைகளைப் பேசிக் கொள்ளாமல், அவரை முழுமையாக நம்பினேன். அவரும் முழு நேரம் என்னுடன் சேர்ந்து அலுவலகத்தில் வேலை செய்தார். வியாபாரம் சரிவரப் போகாததால் எல்லோரும் மீண்டும் வேலைக்குப் போகலாம் என்று முடிவானது.

அந்த சமயத்தில் தான் ஒரு வேலையை முடித்துக் கொடுத்தற்காக ஒரு பத்தாயிர வெள்ளி பணம் வந்தது. அதனை மிக புத்திசாலித்தனமாக அவர் எடுத்துக் கொண்டார். அந்த சமயத்தில் நான் இந்தியாவிற்குப் போயிருந்தேன். திரும்பி வந்துப் பார்த்தப் போது தான் நான் ஏமாற்றப்பட்டது தெரிந்தது. அன்றைக்கு நான் மனம் உடைந்து அழுதேன். அந்த காசிற்காக அழவில்லை. எனக்கு நடந்த நம்பிக்கை துரோகத்திற்காக அழுதேன்.

அன்று தான் நான் படித்த அந்த வரிகள் "தீதும் நன்றும் பிறர் தர வாரா" எனக்குள் பளிச் என்று தோன்றியது இன்று வரை என்னோடு ஒட்டிக்கொண்டுயிருக்கிறது.

வாரக்கடைசிப் புகைப்படம்

2005-07-16T12:20:00.000+08:00

தென்றல் கலைத்த கூந்தல்

2005-07-14T10:51:00.000+08:00

தென்றல் கலைத்த
கூந்தல் முகம் மறைத்தது
சொன்னது:
"பின்" இறுக்கிவைக்கப்பட்டவள்
தளர்த்தப்பட்டதும்
முன்னேறி முகம் விழுந்தேன்,
முத்தம் பெற்றேன்;
தென்றலுக்கு நன்றி!

================================

தென்றல் கூந்தல் கலைத்து
அவள் முகம் மறைத்தது
நினைத்தது;
"இனி என்னை மட்டும் ரசிப்பார்கள்!"

================================

காதலன் அழைத்தப் போது
முகம் பார்க்க நாணம் தடுத்தது
வெட்கி தலைக் குனிந்தாள்
கன்னம் சிவந்தாள்
தென்றல், கூந்தல் கலைத்து
முகம் மறைத்தப் போது
கூந்தல் வழி அவன் முகம் பார்த்தாள்
தென்றலுக்கு நன்றிச் சொன்னாள்!

படம் உதவி துகிலிகை

For thanglish please see the first comment.

செப்புமொழிகள் - 6

2005-07-12T06:22:00.000+08:00

ஒரு நடிகையின் கணவனாக இருப்பதிலே உள்ள மதிப்பு என்ன? சிங்கம் மார்க் பீடியில் சிங்கத்துக்கு என்ன மதிப்போ, ஒட்டகம் மார்க் சோப்பிலே ஒட்டகத்துக்கு என்ன மதிப்போ, அவ்வளவு மதிப்பு அவனுக்கு உண்டு! பீடியை யார் பிடித்தாலென்ன, லேபிள் சிங்கம்தானே!
-கவிஞர் கண்ணதாசன்

For thanglish version see the first comment.

ஆடை

2005-07-11T18:10:00.000+08:00

இன்று நாகரிகம் என்றப் பெயரில் இளைஞர்களும், இளைஞிகளும் ஆடைக் குறைப்பு செய்வதைப் பார்த்ததும் தோன்றியது

அன்று
ஆடை மானம்
- காத்தது
இன்று
ஆடை (தன்)மானம்
- இழந்தது.

Thanglish version - See first comment.:

வாரக்கடைசிப் புகைப்படம்

2005-07-09T08:03:00.000+08:00

செப்புமொழிகள் - 5

2005-07-09T08:00:00.000+08:00

தமிழின்மீது வெறுப்புற்ற ஆண்டவன் தமிழைச் சரியாகத் தண்டிக்க நினைத்தான். அதைத் தூக்கிப் புலவர்கள் கையில் கொடுத்துவிட்டான்.
- கவிஞர் கண்ணதாசன்

புலவர்கள் மட்டுமல்லாது என்னைப் போன்றவர்களிடமும் இந்த இனிய தமிழ், மாடிக் கொண்டு என்னப் பாடுப்படுகிறது. எங்கே சேர்க்க வேண்டுமோ அங்கேப் பிரித்து, எங்கே பிரிக்க வேண்டுமோ அங்கே சேர்த்து, ஒரே குழப்பத்தை உண்டுப் பண்ணுகிறோம்.

For thanglish version see the first comment.

அழுகைமட்டும் உறவாகும்!

2005-07-08T00:00:00.000+08:00

நேற்று இரவு, நண்பனின் மகனை மருத்துவமனைக்குச் சென்றுப் பார்க்க நேர்ந்தது. அதிகப்படியான ஜீரம் என்பதால் மருத்துவமனையில் சேர்த்திருந்தனர். இப்பொழுது அவன் சுகமாக இருக்கிறான். பக்கத்துப் படுக்கையில் ஒரு அழகான பத்து மாத பெண் குழந்தை. முழு நிலவாய் சிரித்தது அந்த பிறை. அதன் அருகினில் மட்டும் யாருமில்லை. என் நண்பன் சொன்னான் "அப்பா அம்மா அந்த குழந்தையை அனாதையாக்கி விட்டுப் போய்விட்டார்கள். ஆசிரமத்தில் உள்ளவர்கள் அந்த குழந்தைக்கு சளி என்பதால் கொண்டு வந்து சேர்த்திருக்கிறார்கள். இந்த தாதிகள் தான் பார்த்துக் கொள்கிறார்கள். அவர்கள் ஒவ்வொருவரும் மாறி மாறி பார்த்துக் கொள்வதால் அந்த குழந்தை சும்மா இருக்கிறது என்று சொன்னான். நான் இருந்த கொஞ்ச நேரத்தில் யாரும் வராததால் அந்த குழந்தை அழுதது. தூக்கிக் கொள்ள யாரும் வரவில்லை. அது அழுதப் போது என் கண்கள் கலங்கி விட்டது. என்ன கொடுமையடா இது. கனத்த மனத்தோடு மருத்துவமனையை விட்டு வெளியே வந்தேன். என் மனதோடு ஒட்டியபடி பிறையும் வந்தது.

காதலில் கசிந்துருகி
காமம் கண்னைமறைக்க
தன்னை இழந்து
என்னை சுமந்தாளோ?

தா(ய்)யார் அவள்
தரமற்ற உறவினால்
தரணியை சொந்தமாக்கி
தனியேவிட்டுப் போனாளோ?

தவமிருந்து பெற்றிருந்தால்
தன்னோடு வைத்திருப்பாள்
தவறாகப் பெற்றதனால்
தவிக்கவிட்டுப் போனாளோ?

காலமெல்லாம் சுமக்க
கணவன் வேணுமினு
பத்துமாதம் மட்டும்சுமந்து
பரிதவிக்க விட்டாளோ?

அமுதூட்டி என்னை வளர்க்க
ஆதரவு வேணுமினு
அனாதை ஆக்கிஎன்னை
அறுத்துவிட்டுப் போனாளோ?

மூலம் தெரியாததால்
முத்தமிட யார்வருவார்
முதுகுதடவி என்னை
தூக்காமலே விட்டிடுவார்.

தூரவிலகி நின்னு
கைநீட்டி அழைத்திடுவார்
தவழ்ந்து அருகில்வர
தரம்சொல்லி விலகிடுவார்!

அள்ளி அனைத்தென்னை
அன்பு சொல்லி பாராட்டி
ஆசைக் கொண்டு
யார் வளர்ப்பார்?

"அம்மா" என்றழைக்க
ஒருவர் இல்லை
அமுதூட்டும் அனைவருமே
தாயாவார் இனி!

மற்றப்படி தனித்திருப்பேன்
அழுகையோடு வாழ்ந்திருப்பேன்
அடுத்தப்பிறவி வரை
அழுகைமட்டும் உறவாகும்!
அதுவே நிஜமாகும்!

For thanglish version look at the first comment

காலம்வரும் வரை

2005-07-07T06:20:00.000+08:00

படம் உதவி துகிலிகை

பெற்றோரை புறக்கணிக்கும் பிள்ளைகள் பெருகிவிட்டார்கள். அப்படி புறக்கணிக்கப்பட்ட ஒரு தாயை நினைத்து எழுதியது இது.

காலம்வரும் வரை
காத்திருக்க வேணுமோ!
காலன் தான்
பதிலைச் சொல்லோனும்!

கண்ணுக்கு கண்ணா
காலமெல்லாம் தவமிருந்து
காட்டுசிங்கங்களா நான்
பெற்றப் பிள்ளைகள்

வீட்டுப் பூனையா
பித்துப்புடிச்சவனா ஆனாங்க
வீதியோரம் நான் இப்போ!

வீட்டுக்கு வந்த
மகாலஷ்மி இரண்டும்
விளக்கேத்த வரல
என்னைவெளியேத்த வந்தாங்க!

வேண்டாத சாமான்னு
வீதியில எறிஞ்சாங்க!
வாரியெடுத்து என்னை
வாசலிலே போட்டாங்க!

தெருவோரம் நான் அமர்ந்து
மகராசனுக்கு காத்திருக்கேன்
எருமையில்வந்து அவன்
ஏத்திக்கிட்டுப் போகும்வரை

வாலாட்டி எருமைவந்தா
எனை அழைக்கவந்ததனு
வாசலைப் பார்த்திருக்கேன்
எப்ப திறப்பாகளோ?

கடைசி ஒருதடவை
பிள்ளைமூகம் பார்த்துவிட்டு
பாவினா போகோனும்
போதும் சாமி நான்
மீண்டும் பிறக்காம இருக்கோனும்!

பொன்னம்மா என் மனைவி

2005-07-06T06:07:00.000+08:00

என்மனைவி என்வீடு
என்மக்கள் என்றெல்லாம்
என் 'பேனா' ஓர் நாளும்
எழுதியதேஇலை; அறிவீர்!

ஆனாலும் எனை அன்று
ஆளவந்த சீமாட்டி
தன்னைப் புகழ்ந்துரைக்கத்
தருணமிது வந்ததின்று!

பொன்னழகி என்மனைவி
பூமியிலும் பொறையுடையாள்!
'பொன்னம்மா' என்றழைப்பேன்
பொங்கிவரும் அன்பினிலே!

அன்னைஎன எனை நாளும்
ஆதரிக்கும் நலமுடையாள்!
பொன்னழகு இலைஎனினும்
பொங்கிவரும் குணத்தழகு!

தாழையாம் பூமுடித்துத்
தடம்பார்த்து நடைநடந்து
வாழைஇலை போலஎந்தன்
வாசலுக்கு வந்தமயில்!

மானமே ஆடைகளாய்
மரியாதை அணிமணியாய்
நாணமாம் காலெடுத்து
நடந்துவந்த வண்ணமலர்

செவிகள்பழு தானாலும்
சேவைச் சிறப்பால் என்
கவிகள்பழு தாகாமல்
காத்துவந்த ராஜாத்தி!

காதோரம் பொய்பேசி
கண்ணெதிரே தீங்கிழைத்து
சேதாரமாகி மனம்
சிதைந்துவிடச் செய்யாமல்
ஆதாரமாக நிற்கும்
அன்புப் பெரும்பரிசு!

பெண்ணென்றால் என்னவென்று
பெரிதும் அறிந்தபின்பே
பொன்னம்மா என்னவென்று
புத்தியில்நான் கண்டுகொண்டேன்!

பட்டகடன் கொஞ்சமல்ல;
பரிதவிப்பும் கொஞ்சமல்ல;
கெட்டகதை கொஞ்சமல்ல,
கீழ்நிலையும் கொஞ்சமல்ல!

தற்கொலைக்கு நான்முயன்ற
சரித்திரம் கொஞ்சமல்ல!
அத்தனையும் தாங்கி இன்று
யாருக்கு வாழுகின்றேன்?
தத்தையவள் என்மனைவி
தாலிக்கே வாழுகின்றேன்!

குடிக்கத் துணிந்ததற்கோ
குத்துகின்ற ஊசிகட்கோ
கண்ணான என்மனைவி
காரணமாய் நின்றதில்லை!

அத்தைமக ளல்ல;
அந்நியந்தான் என்றாலும்
சத்தியத்தில் வந்துதித்த
சமத்துக் குலமகள்தான்!

பொன்னம்மாள் சமையலென்றால்
பூமியெல்லாம் வாசம்வரும்!
தக்காளிப் பச்சடியும்
சாம்பாரும் காய்கறியும்

கொத்துமல்லிச் சட்டினியும்
கோவைக்காய்ப் பொரியலுமாய்
அள்ளி அள்ளி வைத்துஎனை
அருகிருந்து பார்த்திருப்பாள்!

சீர்வரிசை ஒன்றுமில்லை
சீதனங்கள் ஏதுமில்லை
பேர்வரிசை ஒன்றினையே
பெட்டகமாய்க் கொண்டுவந்தாள்!

இன்னும்பல் லாண்டு
இறைவன் கொடுப்பதற்கே
என்மொழியில் அவள்புகழை
ஏற்றமுறப் பாடுகிறேன்!

பொன்னம்மாள் வாழ்க! தந்த
புத்திரரும் நனிவாழ்க!
கண்ணபிரான் பேரருளே
காலமெலாம் எமைக்காக்க!

-- கவிஞர் கண்ணதாசன்

(9/2/50 அன்று தொடங்கிய திருமண வாழ்க்கை 9/2/75 அன்று 25 ஆண்டுகள் நிறைவெய்தியதன் நினைவாக எழுதியது)

பரந்தாமனுக்கு ஒரு விண்ணப்பம்.

2005-07-05T06:20:00.000+08:00

"உன்னுடைய ஆசை என்ன?" எனறு யாரேனும் என்னை கேட்பார்கள் எனில் நான் என்றும் சொல்வது இது தான். அந்த பரந்தாமனை நான் வேண்டிக் கொள்வதும் இது தான்.

இன்னும் ஒரு பிறவி இருப்பின்
ஏழேழு பிறவி எனக்கு இருப்பின்
நல்ல தமிழ் செய்த கவிக்கும்
அவர் போற்றிய அன்பு துணைவிக்கும்
கடைக்குட்டியாய் நான் பிறந்திட வேண்டும்.

அவர் "போற்றிய அன்பு துணைவி" என்பது சாதாரணமாக நான் சொல்லவில்லை. என் தாயார் பற்றி என் தந்தையார் "பொன்னம்மாள் என் மனைவி" என்ற தலைப்பில் அவர்களின் இருபத்து ஐந்தாம் ஆண்டு திருமண நாளில் ஒரு கவிதை எழுதியிருக்கிறார். அந்த கவிதை எனது தாயாருக்கு கிடைத்த மிகப் பெரிய திருமணப் பரிசு. அது எங்களுக்கு கிடைத்த மிகப் பெரிய வாழ்த்து. அதை என்னுடைய அடுத்த பதிவில் வெளியிடுகிறேன்.

செப்புமொழிகள் - 4

2005-07-04T15:39:00.000+08:00

இரண்டு சோம்பேறிகள் சாமியார் மடத்திலே உட்கார்ந்துகொண்டு ஏழுமணி நேரம் பேசினால் அது பத்திரிகையில் வருவதில்லை. இரண்டு மந்திரிகள் சந்தித்துப் பேசினால் மட்டும் வருகிறதே ஏன்?
காரணம்: அதிகாரபூர்வமான சோம்பேறிகள் மட்டுமே பத்திரிகையில் இடம் பெறுவார்கள்.
- கவிஞர் கண்ணதாசன்

நான் இதைப் பற்றி நிறைய தடவை யோசித்ததுண்டு, அதுவும் சமீபக் காலமாக "சன்" டிவி வந்ததிலிருந்து. ஒரு சின்ன விஷயத்தை எடுத்துக் கொண்டு, அதைப் பற்றிய உங்கள் கருத்துக்கள் என்ன என்று, "கட்சி" என்ற பெயரில் இருக்கும் குழுக்களின் தலைவர்களிடம் போய் கருத்து கேட்பது கொஞ்சம் அதிகப்படியாகவே எனக்கு தோன்றியது. மக்கள் நலத் திட்டம் போட்டு, அதை நிறைவேற்றுபவர்கள் பேசியதை மட்டும் தான் இனி செய்தியாகப் போடுவோம் என்று பத்திரிகைகள் முடிவு எடுத்தால் என்னாகும்???!! போடுவதற்கு செய்திகள் இல்லாது பத்திரிகைகள் தடுமாறும்.

ஏன்?

2005-07-04T10:49:00.000+08:00

இருவர் சந்தோஷத்தில்
பிறந்தோம் நாம்.
பிறர் சந்தோஷிக்க
மறுப்பது ஏன்?

************************

பிறப்பால் மனிதனானவன்
இடையில் மிருகமாகி
இறப்பில் தெய்வமானான்.

தேடல் வாழ்க்கையானது

2005-07-03T11:28:00.000+08:00

கவிதையாய் பிறந்து
சிறுகதையாய் உருவெடுத்து
தொடர்கதையாய் வளர்ந்து
தொடர்ந்த வாழ்க்கை விடுகதையானது.
விடைத்தேடியப் போது
விடுகதை பெருங்கதையானது
தேடல் வாழ்க்கையானது.

செப்புமொழிகள் - 3

2005-07-02T19:37:00.000+08:00

கலியுகத்தில் என்னென்ன நடக்குமென்று சொன்ன கண்ணன், கீழ்க்கண்ட கருத்தையும் சொன்னதாகச் கேள்வி: "நடிகையின் பாட்டி, அந்த நடிகைக்கே மகளாக நடிப்பாள்!"
- கவிஞர் கண்ணதாசன்

இது பாட்டிகளுக்கு மட்டும் அல்ல, மற்ற நடிகர்களுக்கும் பொருந்தும் என்று நினைக்கிறேன். பாவம் அந்த நடிகைகள் ஜோடியாக நடித்தவருக்கு அம்மாவாய் நடிப்பது எவ்வளவுப் பெரிய கொடுமை?

வாரக்கடைசிப் புகைப்படம்

2005-07-02T19:31:00.000+08:00

Hongkong-ல் நான் கண்ட காட்சி. பார்த்தவுடன் அதிசயத்தேன். வியப்பில் ஒரு கேள்வி "தாய் புலியுடன் பன்றிக் குட்டிகளா? வேற்றுத் தாய்யை தன் தாய்யாய் குட்டிகள் நினைக்கும் ஆனால் பிற குட்டிகளை தன் குட்டியாய் புலி நினைத்தது எப்படி? மனிதனின் அறிவால் புலி ஏமாற்றபட்டது. பகுத்தறிவு இல்லாததால் புலி தோல் போர்த்திய பன்றி குட்டிகளை தன் குட்டிகளாய் புலி நினைத்தது.அட மானுடா, எல்லா உயிர்களும் ஒன்று என்பதை மிருகங்களுக்கு உணர்த்தி விட்டு நீ மறந்துப் போனாயே!

செப்புமொழிகள் - 2

2005-07-01T06:37:00.000+08:00

அவன் மடையன், இவன் மடையன் என்று பேசாதே.

மடையனை மட்டும் அடையாளம் கண்டு கொள்பவனைப் புத்திசாலியென்று மக்கள் நினைக்க மாட்டார்கள்.
- கவிஞர் கண்ணதாசன்

ஒரு வேண்டுகோள்

2005-07-01T06:25:00.000+08:00

ராம் தன்னுடைய வலைப்பதிவில் அன்னியன் பட விமர்சனத்தை எழுதி இருக்கிறார். அதன் நிறைகுறைகளைப் பட்டியலிட்டு இருக்கிறார். அது தன்னுடைய தனிப்பட்டக் கருத்து என்பதையும் தெளிவுபடுத்தியிருக்கிறார். பல பேர் அந்த பதிவின் கருத்துப் பகுதியில் தங்கள் கருத்துக்களை தெரிவித்து இருக்கின்றனர். அவர்கள் அனைவரும் படத்தையும், படம் எடுத்தவர்களையும், பற்றி மட்டுமே விமர்சனம் செய்து இருக்கின்றனர், ஒருவரை தவிர. அவர் ராமுவையும் அந்த பதிவில் விமர்சனம் எழுதியிருக்கும் அனைவரையும் கேலி செய்திருக்கிறார். வலைப்பதிவு என்பது என்ன? என்னுடைய கருத்துக்களை, என்னுடைய எண்ணங்களை நான் எழுதிக்கொள்வதற்கான ஒரு தனிப்பட்ட இடம். இதில் நான் என்னுடைய கருத்தின் மூலம் அடுத்தவரை புண்படுத்தாதவரை நான் எதை வேண்டுமானாலும் எழுதலாம். அப்படி இருக்க அந்த ஒருவர் மட்டும், தன்னுடைய கருத்துக்களை மட்டும் எழுதாது, விமர்சனம் எழுதிய அனைவரையும் விமர்சித்து இருக்கிறார். என்னை பொறுத்தவரை பொது வாழ்வில் உள்ள ஒருவரைப் பற்றி நாம் விமர்சனம் செய்யலாம். காரணம் அவரைப் பற்றிய பல செய்திகளை நாம் படித்திருப்போம் அல்லது கேள்விப்பட்டிருப்போம். அதை வைத்து அவரைப் பற்றி ஒரு முடிவிற்கு வந்திருப்போம். ஆனால் தனிப்பட்ட ஒரு நபரை விமர்சனம் செய்வதற்கு ஒன்று நாம் அவரோடு வாழ்ந்திருக்க வேண்டும் அல்லது அவரோடு பழகியாவது இருக்க வேண்டும். இவை இரண்டும் இல்லாது ஒருவர் எழுதிய பட விமர்சனத்தை வைத்து அவரை விமர்சனம் செய்வது என்பது ஒரு ஆபாசமான செயல். அதிகப்பிரசங்கித்தனத்தின் உச்சம் என்றே எனக்கு தோன்றுகிறது.

என் சக பதிவாளர்களுக்கும், கருத்து மட்டும் எழுதுபவர்களுக்கும் என்னுடைய தாழ்மையான வேண்டுகோள், தயவு செய்து உங்களின் எழுதுக்கள் மூலம் யாரையும் புண்படுத்திவிடாதீர்கள். நமக்குள் விவாதங்கள் மட்டும் போதும் விவகாரங்கள் வேண்டாம்.

செப்புமொழிகள் - 1

2005-06-30T13:10:00.000+08:00

வயது ஆக ஆகத் தலைமுடி நரைத்துப் பற்கள் விழுவதற்குப் பதிலாக, நாக்கே விழுந்துவிடுமாறு ஒரு ஏற்பாடு செய்தால் நாட்டில் குழப்பமே இருக்காது.
- கவிஞர் கண்ணதாசன்

அற்புதமான ஒரு ஏற்பாடாக அது இருந்திருக்கும். காரணம் இந்த வயதானவர்களால் தானே எல்லா இடங்களிலும் பிரச்சனைகள். தங்களூக்கு அதிகம் தெரியும் என்ற காரணத்தால் தாங்கள் பேசும் அனைத்தும் சரி என்று வாதிடுவார்கள். அப்பா அரசியல் வாழ்க்கையில் இருந்த போது இதனை கண் கூடாக பார்த்திருக்க கூடும். காரணம் இந்த நாட்டை குழப்பியது இந்த அரசியல்வாதிகள் தானே.பாவம் அவர்கள் தான் என்ன செய்வார்கள், காலையில் ஒரு கட்சியிலும் மாலையில் ஒரு கட்சியிலும் மாறி மாறி இருப்பதால் அவர்களே அதிகப்படியான குழப்பத்தில் இருந்திருப்பார்கள்.

மீண்டும் தொடங்கி விட்டேன்

2005-06-29T14:37:00.000+08:00

நான் இரண்டு வாரங்கள் விடுமுறையில் போகிறேன் என்றவுடன் எனக்கு வாழ்த்துச் சொல்லி அனுப்பி வைத்த எனது அருமை நண்பர்கள் அனைவருக்கு என்னுடைய உள்ளம் கனிந்த நன்றி.

சென்னையில், யப்பா, என்ன வெயில் என்ன வெயில்.சூடு தாங்க முடியல. மக்களைப் பார்க்க மிகவும் கஷ்டமாக இருக்கு. எதுக்கு ஆண்டவன் இப்படிப் போட்டு வாட்டுரானுத் தெரியல. இரண்டு வாரங்களே எனக்கு தாங்கல பாவம் சென்னை வாசிகள் எப்படி தான் தாங்குகிறார்களோ?

ம்ம், மற்றப்படி வேற என்ன? சென்னை மிக வேகமாக மாறி வருகிறது. வாகனங்கள் பெருகி விட்டன. ஒருவரை ஒருவர் முந்தப் பார்கிறார்கள், வாழ்க்கையில் அல்ல சாலையில். கட்டிடங்கள் பெருகி விட்டன. எல்லாமே அடுக்கு மாடி குடியிருப்புகளாக மாறி விட்டன. ஜன நெரிசல் அதிகரித்து விட்டது.

மாதம் மும்மாரி பொய்த்து விட்டது. மூன்று (சோ)மாரிகள் தான் வசை மழையைப் பொழிந்துக் கொண்டு இருக்கிறார்கள். தண்ணீர் பிரச்சனை மிகப் பெரிய பிரச்சனையாக இருக்கிறது. ஆனால் சென்னை வாசிகளூக்கு "மெட்டி ஒலி" முடிந்தது தான் பெரிய பிரச்சனையாக தெரிகிறது. நம் மக்கள் தான் எவ்வளவு வேகமாக ஒரு விஷயத்தை ஏற்றுக் கொள்கிறார்கள். "விதி" என்ற பெயரில் எல்லாவற்றையும் இவர்களால் ஏற்றுக் கொள்ள முடிகிறது.

இந்த பயணத்தில் என்னை பாதித்தவைகள் இவை. மற்றபடி அனைவரும் நலம். நான் அதிகம் ஏங்கியது என்னுடைய விருப்பமான வலைப்பதிவுகளை இந்த இரண்டு வாரங்களில் படிக்க முடியவில்லையே என்று தான். அதான் தொடங்கிவிட்டேனே இனி எல்லாவற்றையும் விடாமல் படிக்க முடியும்.

ஒரு மாற்றம் வேண்டும் என்பதால் என்னுடைய வலைப்பதிவின் வடிவமைப்பை மாற்றி இருக்கிறேன்.இனி நிறைய கட்டுரைகள் எழுத வேண்டும் என்ற ஆசை இருக்கிறது. ஒரு புதிய பகுதியாக "செப்பு மொழிகள்" என்ற என் அப்பாவின் புத்தகத்தில் இருந்து எனக்குப் பிடித்த "மொழிகளை"ப் போடப் போகிறேன். படித்துவிட்டு உங்கள் கருத்துக்களை எழுதவும்.

நன்றி. மீண்டும் சந்திப்போம்.

விடுமுறை

2005-06-12T14:23:00.000+08:00

செய்தி: இரண்டு வாரங்களுக்கு தேடலுக்கு விடுமுறை.
காரணம்: 'தேடுபவர்' சென்னைக்குப் பயணம்.

வாரக்கடைசிப் புகைப்படம்

2005-06-11T09:03:00.000+08:00

என் வீட்டு வரவேற்பு அறையில் இருக்கும் பொம்மை இது. இதை ஒரு புகைப்படம் எடுக்க வேண்டும் என்கின்ற ஆசை எழுந்தப் போது எடுத்தப் படம் இது.

வேண்டும் வரங்கள்

2005-06-10T07:35:00.000+08:00

நாராயணன் அவர்களின் வலைப்பதிவில், கருத்துக்கள் பகுதியில் இந்த சுபாவை கண்டேன். அவரின் வலைப்பதிவில் இதனை கண்டேடுத்தேன். அவருடைய நண்பரின் கவிதை ஒன்றை வெளியிட்டு இருந்தார். அதனைப் படித்த பொது........

சில சமயங்களில் சிலரது படைப்புகளைப் பார்க்கும் பொழுது நமக்கு, அடடா இது எப்படி நமக்கு தோன்றாமல் போச்சு. ஏன் இப்படிப் பட்ட சிந்தனை நமக்கு வரல? இவ்வளவு தெளிவாக யோசிக்க எப்படி இவரால் முடிந்தது? இப்படி யோசிக்க எது தேவை? என்ற கேள்விகள் தோன்றிக்கிட்டே இருந்தது.

விடைத் தெரியாமல் தேடுகிறேன், விடைத் தெரிந்தவர்கள் பகிர்ந்துக் கொள்ளவும்.

என்னை வியக்க வைத்த அந்த கவிதை.

முழுமை

2005-06-09T06:00:00.000+08:00

கணவன்:
என்னை இழந்து
என்னை வாங்கி
முழுமையற்றவனாய் நான்!

மனைவி:
என்னை வாங்கி
என்னை இழந்து
முழுமையற்றவளாய் நான்!

பிள்ளை:
முழுமையற்றவர்களின்
முழுமை நான்!

மழை

2005-06-08T08:39:00.000+08:00

இன்றுக் காலை மழையை ரசித்தப்படி வேலைக்கு வந்தப் போது உதித்தது.

அன்று
அட மழை.
இன்றோ
'அட!. மழை.'

மலை

2005-06-08T06:01:00.000+08:00

சலனமற்ற தண்ணீரில்
யாரும்
கல் எறிந்து
கலைக்காத வரை
தன் முகம்
பார்த்தப்படி மலை!

இதயம் தொலைத்தவர்கள்

2005-06-08T05:43:00.000+08:00

இதய வடிவில்
நின்றப்படி
இதயம் தொலைத்தவர்கள்.

பொலிவின் காரணம்

2005-06-06T19:05:00.000+08:00

எனது நண்பர் ராம் வெண்மதியைப் பற்றி 'பொலிவின் சூட்சமம்' என்ற தலைப்பில் ஒரு கவிதை எழுதி இருந்தார். மிக அழகாக ஒரு கருத்தை சொல்லி இருந்தார். அதற்கு மறு பாட்டாய் தோன்றியது தான் இது. இதை அவருடைய பதிவில் ஒரு கருத்தாய் எழுதி இருந்தேன். இது நான் கிறுக்கியவைகளில் எனக்கு மிகவும் பிடித்தது என்பதால் அதனை என்னுடையப் பதிவிலும் கொடுத்து இருக்கிறேன்.

பொலிவின் காரணம்
தேய்வது

தேயும் பொழுதே
வளர வேண்டும் என்கின்ற ஆசை

வளரும் பொழுது
முழுமையாய் வளர வேண்டும் என்கின்ற வைராக்கியம்

வளர்ந்த உடன்
கர்வம் இல்லாது இருப்பது.

-- இது பொதுவாய் எல்லோருக்கும் பொருந்தும், வாழ்க்கைக்கு மிகவும் நன்றாய் பொருந்தும்.

உன்னை நீ அறி!

2005-06-06T09:34:00.000+08:00

என் நண்பனுக்காக என்றோ ஒரு நாள் எழுதியது.

புரிந்துக் கொள்ளுதல் சந்தோஷம்
புரிந்துக் கொள்ளப்படுவது பாக்கியம்

பாக்கியம் விதியின் செயல்
சந்தோஷம் தன் செயல்

பாக்கியம் பெற வேண்டுதல் அவசியம்
சந்தோஷம் பெற தன்னையறிதல் அவசியம்

வேண்டுதல் இங்கு பக்தியைக் காட்டும்
தன்னையறிதல் இங்கு முக்தியைக் காட்டும்

தன்னை அறிய தான் விளங்கும்
தான் விளங்க சந்தோஷம் வரும்

புரிந்துக் கொள்ளல் சுவாசம் ஆகும்
புரிந்துக் கொள்ளப்படுவது அநாவசியம் ஆகும்

நண்பனே, உன்னை நீ அறி!

வித்தியாசம்.....

2005-06-04T06:53:00.000+08:00

உயர் அழுத்ததில்
கரித்துண்டு வைரமாகும்
மனிதன் மரமாவான்!

மோன தவம்!

2005-06-03T20:01:00.000+08:00

படம் உதவி Narayanan

இந்தப் புகைப்படத்தை பார்க்கும் பொழுதுயெல்லாம் கருடன் நினைவு தான் வருகிறது. அதன் விளைவாய் எழுந்தது தான் இது.

வானத்தில் வட்டமிட்டப்படி
நித்தம் தரையில் உணவைத் தேடி
சலித்து விட்ட காரணத்தால்
மோன தவமிருக்க
தரையில் அமர்ந்தபடி
வானம் பார்த்தாயோ?

ஒரு படம். இரு கவிதை!

2005-06-03T17:55:00.000+08:00

பட உதவி Krish

ஏக்கம்!

நடுக்கடலில் நீ
கரையோரம் நான்
நமக்கிடையில்
எல்லையில்லா கடல்.
நீ கரை சேர்ந்தவுடன்
உன் மடி சேர வேண்டும்
எப்பொழுது கரை வருவாய்?

ஆசை!

உன்னை கடலில்
பார்ப்பதை விட
கரையோரம் நின்று
உன்னோடு கடல்
பார்க்க ஆசை!

விடைத் தெரியா கேள்வி?

2005-06-03T00:09:00.000+08:00

பட உதவி Narayanan

உதைத்தவர் இளைப்பாற
உதைப்பட்டு
உருண்டோடி
உயரப் பறந்து
மரத்தில் விழுந்து
தரை தொட்டு
அமர்ந்தப் பந்து
நினைத்தது
"அடுத்து எந்த இடமோ?"

வியப்பு

2005-06-02T14:18:00.000+08:00

பட உதவி Krish

யப்பா!
யார் அவள்?
தென்றல் வேகமாக
கடந்த போது
சிலிர்த்து வியந்த
மரங்கள்!

சீதையின் கேள்விக்கு - பதில்

2005-06-01T23:30:00.000+08:00

எனது நண்பர் கணேஷ் 'சீதையின் கேள்வி' என்று ஒரு கவிதை எழுதி இருக்கிறார். அதைப் படித்தவுடன் தோன்றிய எண்ணத்தை இங்கே கொடுத்து இருக்கிறேன். கணேஷின் கவிதையைப் படித்து விட்டு பின் வருபவற்றை படிக்கவும்.

சீதையின் கேள்வி

என்னை
கரம் பிடித்த ராமனுக்கும்
கண்டுப் பிடித்த அனுமனுக்கும்
கோயில்
ஏன் எனக்கு மட்டும் இல்லை?

பதில்

பெண்மை தெய்வ ரூபம்
நடமாடும் பெண்களில்
உன்னைக் காண்பதால்
கோயில் கட்ட மறந்தனரோ?

நினைப்பு....

2005-06-01T14:20:00.000+08:00

காலணி ஓசை கேட்டு
பதுங்கி ஓடியதுப் பூனை
"பயம்" நினைத்தேன் நான்
"துஷ்டனைக் கண்டால்
தூர விலகு" நினைத்ததுப் பூனை!

ஊக்கம்

2005-06-01T06:28:00.000+08:00

வறண்ட பூமியை
மழை நனைத்த போது
துளிர்த்து முளைத்த
புல் சொன்னது
"துவண்ட மனசுக்கு
ஊக்கம் கொடு
உயிர் வாழ்வதற்கு"

ஏன்?

2005-05-31T07:19:00.000+08:00

உணவுக்கு அன்றி
மிருகங்கள்
ஆசைக்கும்,
கேலிக்கும்,
கோபத்திற்கும்,
பொறாமைக்கும்,
காழ்ப்புணர்ச்சிக்கும்
மற்ற மிருகங்களைக்
கொல்வதில்லை!
மனிதன் மட்டும் ஏன்?

என்னவளின் முகம்

2005-05-30T09:50:00.000+08:00

பனியின்
பாரம் தாங்காமல்
சாய்ந்தப் புல்
நினைவுப்படுத்தும்
என்னவளின்
நாணம் தாங்கிய
முகத்தை.

பொய்

2005-05-29T21:20:00.000+08:00

அம்மா தந்த அன்பு நிஜம்
அப்பா தந்த அறிவு நிஜம்
ஆசான் தந்த கல்வி நிஜம்
ஆண்டவன் தந்த பக்தி நிஜம்
ஆனால் நான் மட்டும் பொய்!

சில நேரங்களில் நாம் பொய்யாய் வாழ்கிறோமோ என்ற எண்ணம் எழுகிறது. மாதா, பிதா,குரு,தெய்வம் இந்த வரிசையை கடைப் பிடித்து வந்த நாம் நிஜமாக தானே இருந்து இருக்க வேண்டும் ஆனால் பொய்யாய் இருக்கிறோமே அது ஏன்?

எச்சங்கள்

2005-05-21T19:47:00.000+08:00

உறவுகள் எல்லாம் எச்சங்களாய்
உச்சம் தலையில் பட்டுடுமே
துடைக்க நினைத்து கை வைக்கையில்
கையும் சேர்த்து அழுக்காகும்
இப்படி தான் அமைகிறது
இவ்வுலக உறவுகள்!

நான் உயிர்ப்பதற்க்கு!

2005-05-21T19:44:00.000+08:00

காதல் சிலுவையில்
என்னை அறைந்தவளே

எப்பொழுது என்னை
தொடுவாய்?

நான் உயிர்ப்பதற்க்கு!

கூகிள்லுக்கும் எனக்கும் என்ன சம்பந்தம்?

2005-05-20T11:13:00.000+08:00

கூகிள்லுக்கும் எனக்கும் என்ன சம்பந்தம்? தேடலுக்கும் எனக்கும் சம்பந்தம் இருப்பதால் கூகிள்லுக்கும் எனக்கும் சம்பந்தம் உண்டு.

இது கூகிளின் புதிய தேடல் தளம். தாங்கள் எதைத் தேட வேண்டுமோ அதை தட்டும் பொழுது, அதன் சம்பந்தமான வார்த்தைகளை, அதன் இடம் உள்ள மற்ற சம்பந்தமான வார்த்தைகளையும் அது காண்பிக்கும்.

முயன்றுப் பாருங்கள் Google Suggest

நிஜமாய் நான்...

2005-05-20T09:23:00.000+08:00

கனவுகளோடு
கற்பனைகள் கலந்து
நிஜமாய் நான்...

நான் என்னைப் பற்றி எழுதுவது எல்லாம், எனக்குள் அடிக்கடி என்னைப் பற்றி எழுந்த கேள்விகளுக்கு எனக்கு கிடைத்த பதில்கள்.

மனித நேயம்!

2005-05-20T09:14:00.000+08:00

அதிவேகத்தில் உலகம்
அவசரத்தில் மனிதர்கள்
அவசியத்தில் மனித நேயம்!

நம்பிக்கை!

2005-05-19T07:02:00.000+08:00

வசந்த காலத்தை
வரவேற்றப்படி
இலையுதிர் காலத்தில்....

நான்....

2005-05-18T18:12:00.000+08:00

என்னை இழந்து
என்னை வாங்கி
முழுமையற்றவனாய் நான்!

(நான் மகன், சகோதரன், நண்பன், கணவன், தந்தை எனப் பல அவதாரம் எடுத்தவன். அவதாரம் எடுக்கும் பொழுது எல்லாம் என்னை கொஞ்சம் கொஞ்சமாய் இழந்தவன். இழந்ததை திரும்பப் பெற முடியாது என்பதை அறியாமல் போனவன். அதனால் முழுமையற்றவன் ஆனேன். அதன் விழைவாய்....)

புன்னகைப் பூக்கள்

2005-05-17T16:03:00.000+08:00

Courtesy ntmani

என்னவளின்
நாணம் மறைத்த
சிரிப்பை
நினைவுப்படுத்தும்
இலை மறைத்த
புன்னகைப் பூக்கள்!

அமைதி....

2005-05-13T13:58:00.000+08:00

நீண்ட நாட்களுக்கு முன்பு எழுதியது...

கரையோரம் ஆரவாரம்
நடுக்கடல் அமைதி
அலை அடித்து அலை எழுப்பும் ஒலி
கரையில் பட்டு அலை
நடுக்கடல் திரும்பும்
அமைதி பெறும்
ஒலி மறையும்.

இளைஞனே,
வெளி உலகம் காண்
ஆரவாரம் கொள்
மனதின் மைய அமைதிக்கு வர
உன்னுள் அமிழ்
எண்ணம் விரிந்து எண்ணம் காண்பாய்
மீண்டும் அமிழ்
நடுக்கடல் அமைதி பெறுவாய்.
உயர்வாய்.
நீ உயர நாடும் உயரும்.

சிந்தனைக்கு....

2005-05-13T11:08:00.000+08:00

எனக்குப் பிடித்த எழுத்தாளர் Richard Bach. என்னை அதிகம் பாதித்தவரும் அவரே. அவருடைய 'Illusions' என்ற புத்தகத்தில் இருந்து என்னை யோசிக்க வைத்த சில வரிகளை இங்கே கொடுத்துள்ளேன். இதைப் பற்றிய என்னுடைய கருத்துக்களை அடுத்த பதிவில் எழுதுகிறேன். நீங்களூம் கொஞ்சம் யோசியுங்கள்.

You

teach best

what you most need

to learn.

மறு சிந்தனை

2005-05-12T14:38:00.000+08:00

ராம் தங்களின் அனுமதியோடு உங்களின் கவிதைக்கு இதனை பதிலாய் எழுதுகிறேன். உங்களின் கவிதையைப் படித்தவுடன் இது எனக்குள் தோன்றியது. மற்றவர்கள் ராமுவின் சிந்தனையைப் படித்து விட்டு தொடர்ந்துப் படிக்கவும்.

இப்போதைக்கு வழித்துணைக்கு
ஆள் இல்லை!

அதனால் என்ன?

எதிர் காலத்தில்
என் காலடிகளைப் பின் பற்ற
பலர் வருவார்கள்.

அது வரைக்கும்
தனிமையில் நான்
இந்த பூமியை
வலம் வருவேன்.

மீண்டும் MRT பயணம்

2005-05-10T12:50:00.000+08:00

நேற்றைய தூக்கத்தை
இரயிலில் தொடர்பவர்கள்

இலவசப் பேப்பரில்
இதயம் தொலைத்தவர்கள்

இரைச்சலை காது மூடி
இசையாய் ரசிப்பவர்கள்

குறுந்தகவல் அனுப்பிய படி
கைத் தொலைப்பேசியில் குறுகிப்போனவர்கள்

புத்தகப் பக்கங்களில்
புத்தியை தொலைத்தவர்கள்

இம்மி அளவும் உள் நகரா
என் இனிய சகப் பயணிகள்

இவர்களுக்கு மத்தியில்
இன்றையப் பொழுதை வரவேற்றப்படி நான்

எங்களை சுமந்தப்படி இணையாத தண்டவாளங்களில்
இரயிலின் பயணம்.

MRT பயணம்

2005-05-09T07:20:00.000+08:00

சிங்கப்பூர் வாசிகளுக்கு இது புரியும் என்று நினைக்கிறேன். தினமும் MRT யில் பயணப்படுவோருக்கு இது ஒரு தினசரி காட்சி. எனக்குள் இது 'ஏன்?' என்ற கேள்வியாய் நிற்கிறது.

அவர் அவர் உலகில்
மிக மிக அருகில்
'MRT' யில் மனிதர்கள்.

வேண்டும்....

2005-05-06T11:41:00.000+08:00

என்னை நானும் அறிந்திட வேண்டும்
அறியும் பொழுதில் உணர்ந்திட வேண்டும்
உணரும் வேலையில் விழித்திட வேண்டும்
விழித்திருக்கையில் வாழ்ந்திட வேண்டும்

--என் தேடலின் முதல் படி இது. என்னை நான் அறிந்திட எது அவசியம்? அறிந்துக் கொள்ள ஆசைப்படுகிறேன்.பதில் தெரிந்தவர்கள் பகிர்ந்துக் கொள்ளவும்.

என் துணையாய்....

2005-05-05T11:19:00.000+08:00

இந்த தேடல் பயணத்தில் என் துணையாய் வரப் போகிறவை
நான் படித்த புத்தகங்கள்,
நான் கேட்ட பாடல்கள்,
நான் சந்தித்த மனிதர்கள்
இனி வரும் நாட்களில் இவைகளை உங்களுடன் சேர்ந்து உரக்க சிந்திக்கப் போகிறேன்...
அவசியம் வந்து உங்கள் கருத்துக்களைப் பகிர்ந்து கொள்ளுங்கள்..

தேடலின் ரகசியம்....

2005-05-05T10:40:00.000+08:00

நீண்ட நாட்கள் இருக்கும் இந்த தேடல் தொடங்கி.....
என்னை அறியும் முயற்சியாய் இந்த தேடல்....
அறிந்துக் கொள்ளும் ஆவலில் இந்த தேடல்....
என்னை அறிந்தவர்கள் எனக்கு வழி காட்டியாய் இருப்பதை விட
என்னை அறியாதவர்கள் வழி காட்டியாய் இருப்பதில் ஒரு நன்மை....
இந்த வலைப்பதிவின் மூலம் உண்மைகள் உரக்க சொல்லப்படும்
உங்களைப் போன்ற வழிப் போக்கர்கள் மூலம் அவை எனக்கு உணர்த்தப்படும்...
என்ற நம்பிக்கையில் இந்த தேடல் தொடங்கி இருக்கிறது......

A new beginning

2005-04-15T02:18:00.000+08:00

Its a new beginning for me.... this is going to be my private place (some time public) to scribble all that I think and do. I wanted to do this long back but only now the time has come... after reading my friend CRAM's blog. His is an eye opener for me. Whenever I thought of having my own blog, I was bogged down by the thought that ... will i have enough information or news or articles to write about... this was until I read through all the blogs... ah ah ... what is now needed is not info but the time. With this thought have started this blog as a first step.